Heyneke Meyer

Frans Ludeke

Die Afrikaanse Naweekpers het verskeie rugbyartikels geplaas en ons bespreek so klompie daarvan onder EEN Artikel.

(To our Non-Afrikaans readership, our apologies that you won’t be able to understand this article, however a very large contingent of our readers are Afrikaans, so we unashamedly accommodate them in this article. The News basically relates to Heyneke Meyer and Frans Ludeke possibly heading to Japan for coaching positions, Francois Hougaard being made available for Super Rugby duties at the Bulls during March to May and suggestions of Referee favouratism and blunders against the Blitzbokke in the Final at the Wellington Sevens Tournament this weekend).

Die nuutste aanduidings is dat beide Heyneke Meyer en die voormalige Vodacom Bulls afrigter, Frans Ludeke, nou in lyn is vir afrigtersposte in Japan.

Verder blyk dit ‘n feitlik uitgemaakte saak dat Francois Hougaard gedurende Maart tot Mei nie deel van die Blitzbokke groep sal uitmaak nie maar ‘n bedeling met die Vodacom Bulls gesluit het wat hom vir ongeveer 8 Super Rugby wedstryde gedurende Maart tot Mei beskikbaar sal stel.

Die laaste aspek wat bespreek word is aantuigings dat die Skeidsregter in die Finaal van die Wellington Sewestoernooi in Nieu-Seeland, seker blatante en ooglopende foute begaan het, om sodoende die Blitzbokke te laat verloor ten gunste van Nieu Seeland, wie op tuisbodem die kroon gevat het in die naweek se toernooi.

Heyneke Meyer:

Twee Japanse klubspanne vry hard na die dienste van die voormalige Springbokafrigter, Heyneke Meyer.

Daar word verneem dat hoewel Meyer nog met geen span ’n amptelike ooreenkoms gesluit het nie, onderhandel die Canon Eagles en ­Docomo Red Hurricanes glo reeds met hom.

Na verneem word kan ’n skuif na ’n Europese klubspan ook nie uitgesluit word nie.

Meyer het in Desember verlede jaar skielik as afrigter bedank ná Suid-Afrika se mislukte Wêreldbekerveldtog in Brittanje.

Meyer het na bewering sedertdien “baie van sy aandag” aan sy gesin en Oos-Vrystaatse wildplaas by Memel gegee, maar dat hy nou weer “so vinnig as moontlik” by rugby betrokke wil raak.

’n Moontlike skuif na Japan sal nie verbaas nie – aangesien daar tans nie juis plek is vir Meyer by sy vorige span, die Bulle, nie. Nollis Marais is tydens die Wêreldbeker as die Pretorianers se Superrugby-afrigter aangestel en sal ’n regverdige kans gegun word om sy eie stempel af te druk.

Meyer is glo ook tans te duur vir die Bulle, wat die laaste tyd van verskeie groot name ontslae geraak het om verligting vir hul knap begroting te bied.

Twee Suid-Afrikaners, Albert van den Berg en Kees Lensing, was die afgelope seisoen by die afrigting van die Canon Eagles se voorspelers betrokke.

Verskeie ander Suid-Afrikaanse breiers – insluitende Allister Coetzee (Kobe Kobelco Steelers), een van die gunstelinge om as Meyer se opvolger aangewys te word – brei ook tans in Japan.

Intussen kan die Suid-Afrikaanse Rugbyunie (SARU) gedwing word om Rassie Erasmus as tydelike Springbok-afrigter aan te wys vir die 3 Toetse teen Ierland in Junie.

Jurie Roux, SARU se huidige uitvoerende hoof in ernstige spêrvuur is in Desember opdrag gegee om self na Meyer se opvolger te soek. Na verneem word kan dié proses nou vertraag word, aangesien SARU Roux se toekoms Vrydag op ’n raadsvergadering sal bespreek.

Frans Ludeke:

Die kern van die Bulle se bestuurspan waarmee hulle in 2009 en 2010 die Superrugby-reeks gewen het – Frans Ludeke, John McFarland en Basil Carzis – gaan volgens ’n ingeligte bron in Japan herenig word.

Rapport verneem dat Ludeke in die plek van die voormalige Wallaby-losvoorspeler Toutai ­Kefu as die Kubota Spears se hoofafrigter aangestel sal word.

Ludeke het verlede jaar, 12 maande voordat sy kontrak as hoofafrigter verstryk het, besluit om sy bande ná ’n sukkelseisoen as Super-afrigter met die Bulle te verbreek.

Hy is daarna vir 3 maande as ’n konsultant deur Fidji vir die Wêreldbekertoernooi betrek.

Ludeke se prokureur, Gerrie Swart, het aangedui dat daar in dié stadium geen kommentaar gelewer kan word oor die bewerings nie. Hy het dit duidelik gestel dat enige beweringe dat sy kliënt by Kubota sal aansluit, in tans “blote bespiegeling” en “voortydig” is.

Een van Ludeke se voorwaardes om sy nuwe pos te aanvaar, was glo om sy voormalige Bul-bestuurslede aan te stel – ’n stap wat as ’n ongewone vergunning deur ’n Japanse klubspan beskou word. McFarland en Carzis is in 2012 by die Bulle weg toe Heyneke Meyer hulle oorreed het om deel van sy Springbok-bestuurspan te word.

McFarland was nog in verlede jaar se Wêreldbeker die Bokke se verdedigingsghoeroe en Carzis hul fiksheidskundige. Nie een van hul kontrakte is ná die rugbyskouspel deur die Suid-Afrikaanse Rugbyunie (SARU) verleng nie.

Intussen maak nóg een van Heyneke Meyer se voormalige bestuurs­lede groot golwe in die Engelse Premier-sokkerliga.

Craig Roberts, die Springbokke se spandokter onder Meyer, het hom enkele weke ná die Wêreldbeker by die klubspan Bournemouth aangesluit.

Sedert sy koms het die “Cherries” reeds met onder meer Manchester United afgereken.

Francois Hougaard:

Francois Hougaard sal eersdaags weer op Loftus Versfeld uitdraf nadat die Blou Bulle Maatskappy ’n ooreenkoms met die Suid-Afrikaanse Rugbyunie (SARU) bereik het.

Hougaard, wat vroeër vanjaar besluit het om homself by die Springbok-sewesspan te skaar, eerder as om in die Superrugby-reeks te speel, sal vanaf Maart vir minstens 8 wedstryde vir die Bulle beskikbaar wees.

Dié ooreenkoms is nog nie gefinaliseer nie, maar daar word verneem dit is “so te sê afgehandel” – met die finale toestemming wat net deur SARU gegee moet word.

Neil Powell, die Blitsbok-afrigter, het by navraag gesê hy verwag om Hougaard vir nog net 3 toernooie – Sydney, Las Vegas en Vancouver – te gebruik voordat hy hom op die Superreeks toespits.

Hougaard sal dan weer in Junie by die Blitsbokke aansluit vir die laaste 2 toernooie in die reeks in Londen en Parys om homself ’n kans te gee om die span na die Olimpiese Spele in Rio de Janeiro te haal.

Die Bulle het reeds 2 Springbok-skrumskakels in Rudy Paige en Piet van Zyl, maar Hougaard het homself verlede jaar op vleuel bevind – en die kans is goed dat hy tydens die seisoen weer dáár gebruik sal word. Sy kontrak met die Bulle het verlede jaar verstryk en tans het hy net ’n Sewes-kontrak van SARU.

Xander Janse van Rensburg, hoëprestasiebestuurder van die Blou Bulle Rugbyunie (BBRU), het bevestig dat hulle ’n aanbod aan Hougaard gemaak het.

“Ons sal hom graag terug op Loftus wil kry. As alles uitwerk, sal hy van middel Maart tot einde Mei by ons inval,” het Janse van Rensburg gesê.

Die ooreenkoms voorsien dat Hougaard 8 wedstryde vir die Bulle kan speel, insluitende op hul toer na Australasië. Hougaard se ervaring tel ook baie, veral vir afrigter Nollis Marais, wat ’n groep jong en onervare spelers het voor vanjaar se toernooi.

Die Springbokke Handré Pollard en Deon Stegmann is boonop beseer.

Hougaard het ’n aanbod van die Engelse klub Worcester gekry, maar dis hoogs onwaarskynlik dat SARU, met wie hy ’n kontrak het, hom sal toelaat om die land vir ’n paar maande te verlaat.

Daar was gerugte dat hy vir die Southern Kings sou uitdraf, maar met die swak finansiële situasie van dié streek lyk ook dít onwaarskynlik. Die kans is goed dat hy ná die Olimpiese Spele oorsee sal speel, met Frankryk of Engeland glo sy top-keuses.

Skeidsregter-skandes in Wellington Sewes:

Nog skeidsregter-skandes het die Blitsbokke Sondag van ‘n sege oor Nieu-Seeland beroof.

Dié keer in die Eindstryd van die Wellington-Sewestoernooi waar die tuisspan met 24 / 21 oor Suid-Afrika geseëvier het.

Met ‘n oop doellyn voor hom is Cheslin Kolbe teruggeroep ná die skeidsregter beslis het Seabelo Senatla se aangee na hom was vorentoe. Die kykweer het ‘n ander prentjie geskets.

Saterdag in die groepfase van die toernooi is die Blitsbokke ook met strafskoppe in die 2de helfte gepeper en die Kiwi’s het dié stryd ook met ‘n drie in die doodsnikke gewen.

Een van die strafskoppe het tot die wendrie gelei. Die Blitsbokke het toe ‘n Kiwi-aanvaller in die lug gehou, maar die skeidsregter het beslis dat dit nie ‘n rolmaal gevorm het nie. Die Blitsbokke is toe gestraf omdat hulle nie weggerol het toe die bondel platgetrek is nie.

Joe Webber het Sondag die harte van Suid-Afrika gebreek met die wendrie wat hy in die hoekie gedruk het. Voor dié drie was die Blitsbokke op 21 / 19 op pad ná ‘n 1te sege in jare in die Nieu-Seelandse hoofstad.

Maar die beker was nie vir hulle beskore nie, al het hulle ‘n heldhaftige vertoning gelewer.

Danksy die 2de plek is die Springbok Sewesspan nou met 54 punte die voorste span ná 3 toernooie op Wêreldrugby se Sewesreeks. Fidji en Nieu-Seeland is onderskeidelik kort op hul hakke in die 2de en 3de plek.

Die Blitsbokke het in Sondag se eindstryd in die 1te halfte op ‘n tyd met 14 / 0 voorgeloop danksy drieë deur Philip Snyman en Rosko Specman. Hulle het Nieu-Seeland voos gehardloop en nie sommer balbesit aan die tuisspan gegee nie.

‘n Verbroude duikslag deur Kwagga Smith het ‘n drie aan Akira Ioane kort voor die rustyd besorg om die Kiwi’s terug in die stryd te kry.

Sonny Bill Williams het ‘n louwarm begin tot sy sewesloopbaan gehad en ‘n wilde aangee kort na die 2de halfte begin het, het die Blitsbokke nog ‘n drie besorg toe Francois Hougaard die bal puik opgepik het en aan Seabelo Senatla uitgegee het. Senatla het ore platgetrek en onder die pale gaan druk vir ‘n voorsprong van 21 / 7.

Maar sowat 3 minute voor die eindfluitjie is Rosco Specman vir ‘n professionele oortreding gegeelkaart en vir 2 minute moes die Suid-Afrikaners met 6 spelers hul voorsprong verdedig.

Rieko Ioane het egter in die tyd 2 keer gaan druk om sy span terug in die wedstryd te kry.

Daarna het die Kiwi’s in die doodsnikke met ‘n poging van meer as 90m vorendag gekom om die wendrie in die hoekie te druk.

Vroeër Sondag het die Blitsbokke behoorlik gekook en Fidji ‘n liederlike sewesles in die halfeindronde van die toernooi gegee. Suid-Afrika het met 31 / 0 gewen om sy plek in die eindstryd te bespreek.

In die kwarteindronde teen Australië het die Blitsbokke ook korte mette van hul teenstanders gemaak en dié stryd douvoordag Sondag met 28 / 12 beklink.

Rapport